Hapunten Abdi, Pa....!!! (Carhastan, Carita Hasil Curhatan)

(ERNI WARDHANI - CARPON)

Duh Gusti, naon atuh kalepatan abdi, tara-tara Pa Permana, kapala di sakolaan, bet ujug-ujug teu nanya. Teu gugur, teu angin. Biasana mah budina teu weleh marahmay manis. Disebut rugi mun teu patanya,  nya biasa waé, sih, tapi dalah kumaha da ku kabeneran manéhna téh jadi pamingpin di sakolaan. Daék teu daék, pan urang kudu aya dina tungtung curukna. Eta gé ceuk paribasa.

Pa Permana karék 5 bulan pindah ka sakola kuring téh, dirotasi jeung Pa Kikim, kapala anu saméméhna. Ayeuna kapaksa pa Kikim kudu ka Kidul. Disebut gedé milik ogé, Pa Permana, da sakolaan kuring téh , kaasup sakola anu pinunjul sagala rupana. Kitu ogé, anu sakumna aya di sakolaan, asa karagragan béntang ku digantina Pa Kikim téh. Ceuk Bu Meti mah, bosen cenah ningali aki-aki téh. Bener ogé da Pa Kikim téh dua taunan deui ka pangsiun.

Ari ieu gagantina, Pa Permana, umurna karék 48 taunan, ceuk ibu-ibu zaman now mah, cenah keur meumeujeuhna. Sok disarebut "Hot Daddy". Pas Pa Permana dikenalkeun ku pangawas sakola, éta ibu-ibu ting teu sirikna ting karocéak, bangun tara ningali anu gandang. Disebut kasép, nya lumayan, kumis ipis luhureun biwirna anu semu galing. Henteu rabig pabaliut jeung huntu. Atuh pangawakanana pas, beuteungna oge teu budayut. Bangunna resep olah raga. Pokona gué banget, ceuk Bu Dilah mah. 

Geus 2 bulan kalarung, babaturan sakantor ngagosipkeun, yén Pa Permana cenah boga perhatian husus ka kuring. Lantaran ceuk titingalian batur mah, ka kuring sok rada béda. Boh cara neuteupna, lamun pas ngobrol, boh lamun keur ngawangkong, cenah sok remen rada nananyakeun kuring. Mimitina mah, kuring teu perhatian, laun-laun, enya, karasa ngabédakeunana téh. 

Mimiti sok seuri wungkul, terus sok rajeun manggil ka tempat gawéna, nanyakeun hal-hal anu sabenerna mah asa teu kudu ditanyakeun, nepi ka sok remen ngajapri. Teu kaganggu sih, da memang salila ngajapri, manéhna tara macem-macem. Masih tarap sopan. Nya lamun kabeneran aya waktu, sok dibalesan, tapi tara langsung, sok diawahan 15 nepi 20 menitan. Bisi pajar sok leukeun nyepeng hénpon. Kungsi nelepon sababaraha kali, nya diangkat, da mémang aya patula patalina jeung gawéan.

Ari ayeuna, paromanna beut jadi 180 darajat bédana téh. Kuring teu ibur ka babaturan, bisi pajar baper. Mimitina mah, babaturan gé euweuh anu perhatian masalah Pa Permana siga anu ngajauhan kuring téh. Tapi lila-lila kaangseueun ogé. Ma'lum manusa, ari kana kagoréngan mah, nanaon téh, mani langsung nyebar. 

"Bu, boa Pa Permana timburu ka Pa Hénhén, soalna Pa Hénhén sok rada purunyus ka Ibu!" ceuk Bu Linlin.

"Sigana mah ngajakan wakuncar, Bu Wéni na alimeun," Bu Téja nyanyahoanan.

Lila-lila, kapikiran ogé, da mémang, sikep Pa Permana jadi jauh tanah ka langit jeung kamari ieu.

Kuring panasaran, dipikiran mah, asa teu tuah, teu dosa. Boh pas di sakola...ké...ké...terakhir ngobrol, basa babarengan jeung guru-guru, sakali-sakali panonna maling-maling melong ka kuring. Kuring apal, da mémang sarua, kuring gé sok maling-maling neuteup manéhna. 

Lagu keur nyalse, pas keur mukaan WA, naha ujug-ujug hayang muka WA ti Pa Permana. Maksud téh, sok rajeun resep wé macaan deui, ngan paurna manéhna keur onlén, téngsin bisi kapanggih modal.

"Last seen 14:38. rét kuring ngarérét, geus 20 menitan ka tukang. Nyéh, kuring seuri. Tapi sabenerna mah can ngarti, éta téh terakhir manéhna muka WA kuring atawa WA manéhna. Teu dipikiran deui, da kuring hayang nyekrol macaan anu kamari-kamari. Karék gé dua skrolan, ari gebeg téh, pas ningali chat kuring jeung manéhna. Gustiiii...boa ieu anu matak Pa Permana jadi ngajanggilek.

Teu pira, pas manéhna nanya, "Kumaha, keresa pami abdi ngalangkung ka palih dinya, abdi badé nyimpang?"

Rarasaan mah harita nulis teh," Mangga, Pa..." singhoreng pas nulis, kuring typo, naha bieu dibaca bet jadi,"Mangga, Oa..." duh pantesan rék ambek gé, da kuring nulis Oa. Padahal éta typo. 

Hapunten Oa, eh, Pa...abdi typo....

Bio Penulis Penulis

Penulis adalah Ketua Bidang Literasi IGI Jawa Barat
FB: Erni Wardhani
WA : 085222371067
Youtube, Tiktok: Erni Wardhani